Trading se lavi

Djikadash
Aug 18
3 min read

Updated: Sep 14

Pou anpil moun, tande yon moun di “mwen fè lajan nan trading” se tankou yo tande yon blag. Reaksyon yo rapid:

“Ou se yon scammer!”

“Sa se aza, menm jan ak kazino.”

“Ou se yon gambler.”

“Ou sanble ak moun fou pou mete kòb ou nan sa.”

Men, èske vrèman sa yap di yo se verite? Oswa èske se mank konpreyansyon kap pale? Nan blog sa a, nap dekouvri poukisa trading se pa yon jwèt aza, poukisa li plis sanble ak yon “relijyon” ki mande disiplin ak lafwa nan konesans ou pouw kapab reyisi ladann, epi poukisa se sèlman moun ki mete tèt yo seryezman ladan ki rive wè diferans lan.

1. Poukisa yo panse trader yo se “scammer”?

Nan mond lan, gen anpil moun ki sèvi ak non trading pou fè magouy: ponzi, fo platfòm, ak “kopi trading garanti” kote yo pwomèt pwofi chak jou. Se manti sa yo ki fè moun gade tout trader menm jan.

Men yon vrè trader pa janm pwomèt pwofi garanti. Paske mache a enprevizib. Yon bon trader pito di:

“Mwen ka pèdi jodi a, men ak bon estrateji, mwen kapab genyen plis nan long tèm.”

Scammer vann rèv.

Trader reyèl vann disiplin ak konesans.

2. Poukisa yo konpare trading ak “aza”?

Wi, si ou antre nan mache a san konesans, san plan, se aza ou vinn jwe. Men, aza pa gen analiz. Nan kazino, ou pa ka etidye tablo pou konnen si kat pwochen an pral vini. Men nan trading:

Ou ka analize grafik yo pou idantifye tandans

Ou ka swiv nouvèl ekonomik pou konprann mouvman mache yo

Ou ka kalkile risk reward ratio pou jere pèt ou

Diferans lan se tankou:

Yon moun ki jwe loto ak espwa

Yon enjenyè kap konstwi yon pon avèk kalkil presi

3. Èske trader yo vrèman se yon“gambler”?

Yon gambler fè parayj san okenn règ, li mete tout espwa li nan chans.

Yon trader pwofesyonèl pa janm mete plis pase 1%–2% nan kapital li nan yon tranzaksyon.

Egzanp:

Gambler mete $1,000 sou yon match foutbòl, li pèdi → kapital fini

Trader riske $20 sou $1,000 nan yon trade, li pèdi → li toujou gen $980 pou kontinye jwe estrateji li

Sa fè diferans ant yon moun ki depann de chans ak yon moun ki depann de matematik, analiz, ak disiplin.

4. “Moun fou” oubyen yon moun ki konprannyon pati nan ekonomi?

Si ou gade yon moun kap pase 10 èdtan ap gade grafik, ou ka panse li fou. Men se menm bagay ak yon chirijyen kap pase 10 èdtan nan laboratwa ap fè rechèch, oubyen yon atis kap pase nwit san dòmi ap travay sou yon tablo.

Se pasyon sa yo ki fè yo kontinye. Se lafwa nan metòd yo ki fè yo kenbe disiplin. Se poutèt sa anpil trader konpare trading ak yon relijyon:

Ou bezwen kwè nan estrateji ou menm lè li difisil

Ou bezwen fè sakrifis (tan, enèji, pratik)

Ou bezwen gen disiplin pou respekte règ ou yo chak jou

Nan fen jounen an, se “moun fou” sa yo ki gen vizyon, paske yo wè pi lwen pase sa tout moun kwè ki posib.

Konklizyon

Lè wap gade trading tankou jan yap vann li sou entènet la, li fasil pou panse li se yon jwèt aza oswa yon magouy. Men pou moun ki andedan li, trading se plis pase yon pwofesyon. Trading se lavi, yon vi ki mande anpil disiplin, sakrifis, ak konfyans nan estrateji ou.

Se pa tout moun ki ka konprann li konsa. Men se pou sa, moun ki kwè ladann gen pasyans pou aprann, pratike sou yon kont demo, epi egzekite li sou yon kont reyèl.