Mache Travay Ozetazini ap Febli: Ki Efè sou Fed, Bitcoin ak Kripto?

Mache travay la toujou se youn nan endikatè ki pi enpòtan pou mezire sante ekonomik yon peyi. Lè gen plis djòb, sa vle di konsomatè yo ka depanse plis, biznis yo ka grandi, epi ekonomi an rete solid. Men lè mache travay la kòmanse febli, sa se yon siyal ke bagay yo ap chanje.

Nan dènye mwa yo, rapò sou travay Ozetazini montre kèk chif ki bay enkyetid: mwens opòtinite travay, anbòchaj ki ralanti, ak plis moun k ap pèdi plas yo. Se yon nouvèl ki gen gwo konsekans, pa sèlman pou travayè yo, men tou pou Rezèv Federal la (Fed) ak envestisè nan mache finansye yo, espesyalman nan Bitcoin ak lòt kriptomonè.

Dènye chif yo

Rapò ofisyèl sou travay Ozetazini montre yon gwo feblès nan mache travay la. Gen 3 gwo pwen pou remake:

• Opòtinite travay yo bese a 7.18 milyon – gen mwens djòb ouvè pou moun kap chèche travay.

• Anbòchaj vin pi fèb depi 2020 – konpayi yo ap pran mwens moun, yon siy ke yo pa kwè ekonomi an ap grandi.

• Revokasyon (layoffs) ap ogmante – plis travayè ap pèdi plas yo.

Tout siy sa yo montre konfyans nan biznis yo ap bese, epi yo ap pran prekosyon.

Ki konsekans pou Fed la?

Rezèv Federal la (Fed) toujou sèvi ak mache travay la kòm yon baromèt pou deside politik monetè li.

• Lè travay solid, Fed gen plis espas pou kenbe oswa monte to enterè yo pou konbat enflasyon.

• Men lè yo wè mache travay ap febli, yo santi presyon pou yo bese to enterè pou evite ekonomi an tonbe nan resesyon.

Sa vle di yon travayè ki pèdi plas li se yon gwo siy pou Fed la ke ekonomi an ap ralanti.

Poukisa envestisè yo dwe veye sa?

Yon Fed ki bese to enterè yo pote kèk efè dirèk:

• Dola a vin pi fèb, paske to enterè pi ba fè moun chèche lòt kote pou envesti.

• Pri byen finansye yo ka monte (Stock, bonds, lò, kripto) paske gen plis lajan kap sikile nan sistèm nan.

• Envestisè yo vin plis chèche byen altènatif ki pa depann twòp de bank santral.

Poukisa kripto ka pwofite?

Bitcoin ak lòt kriptomonè yo toujou wè, kòm yon mwayen pou pwoteje tèt nou kont feblès dola. Lè Fed kòmanse bese to yo oswa si mache travay la montre feblès, anpil envestisè:

• Envesti nan Bitcoin kòm yon “digital gold”

• Mete lajan nan kripto pou chèche retou pi rapid

• Sèvi ak kripto kòm yon baryè kont politik monetè tradisyonèl yo

Nan dènye ane yo, chak fwa Fed bay signyal yo pap ogmante oswa bese to enterè, Bitcoin te konn pran yon “rally” sa vle di monte 📈

Konklizyon

Sitiyasyon aktyèl la pa bon pou moun kap chèche djòb, men pou envestisè yo, li kapab ouvè pòt pou yon nouvo vag opòtinite. Yon mache travay ki ap febli vle di plis chans pou Fed chanje direksyon, e sa kapab bay plis gaz pou Bitcoin ak kripto monte.

Nan ekonomi, sa ki sanble move nouvèl pou travayè yo ka tounen bon nouvèl pou mache finansye yo. Se la balans lan toujou egziste.